أكونت محمود أحمد : https://www.facebook.com/MidooDjz
رابط المنشور الأصلي :
https://www.facebook.com/MidooDjz/posts/10152720228414263
أحيانًا أو غالبًا بتكون (النية) وحدها هي سبب فشل تنفيذ أي طموحات أو احلام وأمنيات، في السطور الجاية هستعرض (السيرة الذاتية) CV من أيام الإبتدائي لغاية نهاية ٢٠١٤ يمكن من خلال السطور الجاية شخص يبدأ ينفذ طموحاته وأحلامه بالأفعال وليس بالنية فقط.
- في عام ١٩٩٤ كنت جايب كرتونة صغيرة وببيع عليها (حلاوة) للأطفال.
- عام ١٩٩٥ وقفت ابيع في السوبر ماركت بتاع والدي كمساعد لوالدي وللي بيشتغل في السوبر ماركت.
- عام ١٩٩٦ بدأت ابيع (حلاوة) بس زودت الميزانية شوية فكانت الكرتونة اللي برتب عليها علب الحلاوة أكبر والمكسب أكتر.
- في ١٩٩٧ والدي اشترى مزرعة وبدأ يخودني معاه أنا واخويا الكبير والصغير، نزرع ونقلع ونعزق وننظف ونحصد وندرس الخ تقريبًا لغاية ٢٠٠٤ وقفت اي شغل في المزرعة بعد كدا.
- في ١٩٩٨ استمر وجودي في السوبر ماركت واشتغلت فيه قبل فترة دراستي المسائية يعني من ٧ الصبح ل ١٠ الصبح بقف لوحدي ابيع للزباين.
- استمر عام ١٩٩٩ البيع في السوبر ماركت وكنت بشتري مجلة ماجد على جنب اثقف نفسي منها واشارك في مسابقتها.
- عام ٢٠٠٠ أول مرة اشوف PC كمبيوتر بجد مش (صخر) والعب وادخل انترنت (دايل اب)، شات وايميل جديد.
- من عام ٢٠٠٠/٢٠٠١ لغاية ٢٠٠٣ استخدمت الانترنت تعارف، ادارة منتديات، لعب في أكواد HTML، وشوية كلام فارغ.
- عام ٢٠٠١ اشتغلت في المعمار تقريبًا كل حاجة (صبي بنّا)، (نجار مسلح)، (نقاشة)، وحتى شيال شكاير اسمنت ورملة مهزوزة.
- عام ٢٠٠٢ اشتغلت نجار وعملنا خلايا المنحل بتاع والدي في المزرعة (اللي بتشوفها في التلفزيون دي).
- عام ٢٠٠٣ عملت أول موقع شخصي ليا كان تحميل أغاني مسروقة من موقع سارق من موقع برضه.
- عام ٢٠٠٤ عملت منتدي أغاني بالشراكة مع صديق من المنصورة، وسيبته ليه في نهاية السنة. كان ترتيب المنتدي وصل ٢٢ ألف في اليكسا.
- عام ٢٠٠٥ اشتغلت في سيبر نت لأول مرّة علشان أفضل موجود أطول فترة ممكنة ع الانترنت ب ١٣٠ جنيه في الشهر.
- عام ٢٠٠٦ سيبت السيبر واشتغلت في مزرعة بطيخ على طريق مصر اسكندرية الصحراوي ب ٦٠٠ جنيه في الشهر والمهمة تنظيف الأرض من الحشائش من ٦ الفجر إلى ٥ عصرًا مع العرب.
- نهاية عام ٢٠٠٦ اشتغلت في ورشة تزييت وتشحيم في بنزينة كعامل نظافة للسيارات والباصات مسؤول عن رشاش المياه ب ٢٠ جنيه في اليوم شاملة البقشيش يتقسم عليا انا والاوغاد اللي معايا في منطقة ملجأ الصيادين تقريبًا في منطقة غيط العنب بالإسكندرية.
- عام ٢٠٠٧ رجعت للأنترنت واشتغلت في سيبر تاني بس المرة دي ب ١٦٠ جنيه في الشهر و اتعرفت على صديق من قطاع غزة وعملنا موقع (البُعد الآخر) واشتغلنا عليه، وغيرنا اسمه ل (عرب داونلود) بعد كدا وتم بيع الموقع عام ٢٠٠٩.
- عام ٢٠٠٧ أول شيك يوصلني من شغل في الإنترنت ب ١٦٠ دولار والشيك وقتها وصل بإسمي المستعار MidooDj. لن أنسى.
- عام ٢٠٠٨ كنت إتقنت التعديل على نظام المنتديات ipb وكمان نظام إدارة المحتوى data life engine الروسي وبفضل الله ساهمت في تعريب وترجمة ملفات بها الآف الكلمات في اكثر من إصدارة.
- عام ٢٠٠٩ سافرت القاهرة واشتغلت في شركة ناشئة للإستضافة والبرمجة والتصميم ب ٦٠٠ جنيه في الشهر في السلام وكنت بنام على الأرض لمدة ٤ شهور في الشتا على سيراميك بيفصلني بينه كرتونة الكمبيوتر.
- عام ٢٠١٠ وقفت كل حاجة ورجعت بيتنا، هدنة وإعادة ترتيب أولويات.
- من عام ٢٠١٠ حتى نهاية ٢٠١٢ بدأت واتعلمت تسويق وشبكات إجتماعية واشتغلت شغل حر، مكان شغلي كان عبارة عن (بيت جديد) على المحارة ومش متبلط والمكاتب عملناها من صناديق ليترات البيبسي الزجاج والخشب ابلكاش قديم، وتلاجة ومطبخ وبوتجاز ماما القدام، والإستحمام تسخين مياه وتجربة (الكوز).
- عام ٢٠١١ أسسنا وأطلقنا صعيدي جيكس وكان مجرد حلم والآن أصبح حقيقة وقريب هنكمل ٤ سنين شغل تطوعي.
- نهاية ٢٠١٢ اخذنا مقر لصعيدي جيكس في محافظة قنا تم تنفيذه بالجهود الذاتية بالكامل علشان ننفذ فيه اي ورش عمل وفعاليات وكورسات ومازال قائم بفضل الله.
- عام ٢٠١٣ اشتغلت في شركة من أكبر الشركات في المنطقة العربية (دوبيزل) مصر.
- نهاية عام ٢٠١٣ تواصلوا معايا افراد من شركة جوجل وأصبحت مسؤول عن (مجتمع جوجل للأعمال) بصعيد مصر GBG.
- عام ٢٠١٤ اشتغلت كمدير ومسؤول عن الشبكات الإجتماعية بشركة (حسوب - Hsoub) ومازلت في نفس الوظيفة، قمت أيضًا ولأول مرّة بتنفيذ أعمال تقنية خاصة بالحكومة الأماراتية، وفي نهاية العام قبلت بوظيفة جديدة بأكبر المؤسسات الإعلامية كإستشاري تسويق.
- نهاية عام ٢٠١٤ تزوجت من أحببت.
خلال كل ما سبق دموع ، وأفراح، وترّقب، وطعنات، ولحظات نجاح، ولحظات يأس، لن أنسى ما حييت من تعلمت منهم لم اخجل يومًا في سؤال جوجل عن اي شئ، وان عجز جوجل عن الإجابة الجأ لإصدقائي في نهاية المطاف.
أهدافك هتكبر كل ما بتكبر، مش لازم تحقق كل أهدافك اللي خططتها في سنة بس المهم المكنة تطلع قماش حتي لو الكمية قليلة، نصيحة اقرأ الكلام مرّة تانية علشان تعرف إن أي شخص انت منبهر بيه هو في الحقيقة عبارة عن سنين صمود وعزيمة وإرداة وتضحيات وقدّم مئات التنازلات.
تلميح: لست متأكدًا من التواريخ.
تلميح: شكرًا لكل شخص ساعدني حتى اللحظة، أو ساعدني في وقت من الأوقات.
في النهاية تدبّر الآية الكريمة
(وَأَنْ لَيْسَ لِلْإِنْسَانِ إِلَّا مَا سَعَىٰ) [سورة النجم : 39]
وابدأ بعدها فورًا. #عافر
- نهاية عام ٢٠١٤ تزوجت من أحببت. دا نك تمسك بكل اللى قبلها من طموح
ردحذف:)