المهندس مصطفى حمودة يجيب عن أكثر الأسئلة تكرارًا لطلاب الجامعات في تخصص تقنية المعلومات

‫#‏سؤال‬ مهم وجواب أكثر من رائع
بواسطة المهندس : مصطفى حمودة 
https://www.facebook.com/bu3ny
السؤال اللى كل يوم حد بيسألهولى - أبدا ازاى وانا فى الكلية - أزود خبرتى ازاى - ايه رأيك فى ال ITI وادخله والا لا !!!
بكل بساطة وانت فى أولى كلية شوف لك مركز تدريب "اهم حاجه المدرب يكون كفاءه وملتزم بالمواعيد وسمعته اوستيك" - خد لك اى كورس يعجبك "العدد الطبيعى عشان تقدر تحدد ميولك مابين 3 - 4 كورسات" بعدها هتحب حاجه اكتر من التانيه - اللى تحبه اشتغل فيه وابدع فيه - ماتحاولش تستنسخ نفسك لاى حد تانى - باختصار خلى شغل الكلية عشان الشهاده اللى فى النهاية هتبلها وتشرب ميتها وتبقى دليل اثبات انك خريج جامعى - توقع انك هتستفيد من 3 - 4 مواد من اصل 40 مادة هتدرسها فى الكلية - عشان كده لازم تركز عالكورسات بره لانها غالبا سوق العمل الحقيقى - اتعلم انجليزى كويس جدا لانك اول ماتخلص غالبا هتخلع بره مصر وحتى لو كملت لازم تكون بتعرف انجليزى عشان تقاريرك هتسلمها بالانجليزى برده
تانى احسن مجال بتحبه اتعلمه بدرجة اقل من مجالك الاصلى وحاول تكون مجتهد فيه - مش لازم تبقى عبقرى فيه - لكن اعرف اللى يشغلك - خلى معرفتك شبه بعض - يعنى ماتروحش تتعلم شبكات واوراكل مثلا - حاول تخليك subject relative !!!
تزود خبرتك ازاى دى اسهل مما تخيل - شوف واحد من اللى بيسموهم ال Geeks والزق له لزقه بغره - شوف حد تعلمه اللى انت اتعلمته - ابدأ شوف مشاريع بتتعمل عالنت واعمل زيها - ابنى لنفسك test lab بدل ماتشرب سجاير وتجيب سجاير حشيش فى العيد !!!
ال ITI حلوة جدا لو انت مكنتش اصلا مظبط نفسك - لكن لو انت كنت بتظبط نفسك طول ال 4 سنين هتتخرج مش محتاجها وهتكون شغال اساسا بمجرد انك تخلص - انا افتكر انى قدمت فى ال ITI وعديت كل حاجه وجيت فى ال interview النهائى اتسألت ايه وظيفتك قلتله Linux Consultant الراجل كان هيجيله شلل نصفى ونده لى مديره شخصيا يعمل لى انترفيو بعد ما هددنى لو كنت باكدب - مديره قعد يعمل معايا مقابلة لمدة 42 دقيقة مغلطتش فى ولا سؤال واتقبلت وفى الاخر مدخلتش بسبب الجيش !!!
لو دخلت الجيش ولقيت نفسك طورت مستواك اكتر فكك من ال ITI نهائى - بالمناسبة انا بعد ماخلصت جيش جالى شغل تدريس فيها وامسك القسم بتاعها فى القرية الذكية ورفضت لانى وقتها قولت مش طموحى وانها اقل من انى اشتغل فيها وقتها !!!
حاول تشيل اى حاجه بتكتفك ورا ضهرك - شوف لك حاجه تظبط مزاجك - لو فقدت المتعة هتفقد الابداع - احيانا كنت بالعب مع زمايلى بال 6 ساعات متواصل PES !!!
خلى احلامك كبير وكل شوية امسح الاحلام القديمة وحط اكبر منها - انا كنت معلق ورقه عالحيطة فوق سريرى انى قبل سن ال 30 ابقى RHCE,CCNP -الحمد لله النهارده بقيت RHCA و CCNP ومعاهم شوية حاجات كتير كده على جنب !!!
ماتتوقعش انك اول ما تاخد كورس هتلاقى الفلوس نازله مطره عليك - لازم تتمرمط ويطلع عين اللى خلفوك - انا كنت باعيش اجازة الصيف كاملة بمعدل اتنين جنيه ونص - مقابل انى اطلب من اهلى كورسات والباقى يتحوش عشان اكمل تمن الكورسات
مش شايف اى عيب نهائى انك تروح تاخد كورس وتفشل فيه - ماتتوقعش ان الحياة وردية وكل حاجه هتتعلمها هتبقى فيها Geek !!!
كل حاجه اتعلمتها حاول تعلمها لغيرك "ده مجازا اكيد لانك عمرك ما هتقدر تعلم كل حاجه اتعلمتها لغيرك - لكن خلى نيتك كده"
اعرف ان كل حاجه بتتعلمها فيها لله حق سواء حق مال او حق علم - حق المال الزكاة والصدقه وحق العلم هو اخراجه للناس
افهم كويس واقتنع ان فى ناس غيرك واحسن منك مليون مره ولو انت مش هتخرج علمك وزكاتك ربنا هيشوف حد غيرك - "وَإِنْ تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لا يَكُونُوا أَمْثَالَكُمْ"
اهم حاجه وانت بتعمل كل ده صفى نيتك لله - لو نيتك من الاول مش لله كل ده ملهوش لزمة حتى لو اتعلمت كل علم الارض
اخر حاجه افتكر ان المال الحرام مش هيفيدك - اى فلوس تاخدها من حد عشان تعلمه وتاخدها وتفك - او اى مشروع تعمله ومتعملوش بضمير فانت كده فتحت على نفسك بلاوى مش هتعرف تسدها - "فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ"